Napoli ka arritur të shënoj fitore minimale me rezultat 0-1 në udhëtim tek Lecce në kuadër të xhiros së nëntë në Serie A.

Pjesa e parë u mbyll pa gola, derisa të parët që erdhën në mundësi shënimi ishin vendasit, shkruan Arbresh.info.

Gjatë minutës së 55-të, Lecce fitoi penallti mirëpo nga pika e bardhë gaboi Camarda.

Disa minuta më vonë saktësisht në të 69-tën, Napoli kaloi në epërsi me golin e Anguissas pas një asistimi nga David Neres.

Deri në fund nuk pati gola tjerë dhe Napoli arkëtoi tri pikë të reja që e mbajnë lider. Pas nëntë ndeshjeve skuadra e Contes ka 21 pikë, kurse Lecce gjashtë sosh dhe ndodhet në pozitën e 16-të.

Në këtë sfidë për Leccen u paraqitën dy lojtarët e kombëtares shqiptare, Medon Berisha dhe Ylber Ramadani.

I pari luajti deri në minutën 77-të, kurse Ramadani u paraqit gjithë ndeshjen.

Derisa tek Napoli, kapiteni i Kosovës, Amir Rrahmani qëndroi në bankën rezervë. Ai sapo është rikthyer nga lëndimi i cili e mbajt dy muaj jashtë fushave. Minuta pritet të marrë në ndeshjen e fundjavës ndaj Comos.

Gjersa, Lecce në javën e 10-të takohet me Fiorentinën./Arbresh.info